政Whats噏:梁耀忠謀永續參選引爆退黨潮?

作者:Julia    發表日期:2018-01-14 10:33:02

自認「政壇李克勤」的民協前立法會議員馮檢基(阿基)遲遲不肯交棒,並一意孤行要參與立法會九龍西補選,被網民嘲諷佢想「永續參選」。另一民主派老將、與馮檢基同樣已64歲嘅現任街工立法會議員梁耀忠,近日亦向黨友透露有意喺下屆立法會繼續參選,並且想由現時嘅超級區議會功能界別(超區),重返新界西地區直選,令其他黨友更難上任,引發2名街工區議員先後退黨。

在新界西多度連任嘅梁耀忠,喺2016年立法會選舉決定冒險轉戰超區,改由中生代黨友黃潤達出戰新界西,雖然最後隻有阿忠當選,黃潤達落敗,但起碼係嘗試過交棒同企圖為街工爭多個位,冇人會怪佢。不過,據聞佢近日向黨友多番表示,自己日日跑步,「精力充沛」、「唔做嘢唔得」,暗示會繼續參選競逐連任。

最離譜嘅係,阿忠唔係想循超區連任,而係有意重返新界西老巢出戰,理由係佢早前主持立法會主席選舉期間臨陣退縮,惹來不少民主派支持者同網民猛烈批評,令佢自感政治能量大跌。由於其他街工成員缺乏全港性知名度,冇乜可能轉戰超區,此舉意味街工喺2020年立法會換屆選舉,可能隻有阿忠一人出選,其他人最少要再等多6年先有望上位,自然會引起不滿。其中葵青區議員梁錦威及周偉雄,最近先後退出街工,令該黨隻餘下包括阿忠、黃潤達及梁誌成3名現任區議員。

梁耀忠接受查詢時,自稱仍未決定下屆會否參選,反指有關言論係有心人造謠,又強調周偉雄退黨絕不涉及選舉問題。黃潤達則指周偉雄退黨係想多啲時間陪伴家人,至於佢自己就仲未考慮參選事宜喎。咁啱今日黃潤達去咗立法會做嘢,阿忠就即刻急Call佢現身一齊闢謠。

民協喺今屆區議會及立法會選舉失利後,被地區死敵民主黨撬走咗多名區議員及資深黨員,令該黨早已「空洞化」,加上阿基近日聲言今次補選係佢最後一次參選,隨時經過2019年區議會及2020年立法會換屆選舉洗禮後,民協從此會喺香港政壇上消失!同屬老牌民主派地區政團嘅街工,會否步民協後塵逐步萎縮摺埋,大家拭目以待喇!


本文來源:http://hk.on.cc/hk/bkn/cnt/news/20180113/bkn-20180113123658367-0113_00822_001.html




Tag:
本文鏈接:http://www.mud-pumps.com/68904.html