拿卡錫迪敗家 熱刺地獄賽程3場搶7分

作者:Victoria    發表日期:2018-02-11 00:11:28

即上英超刨績王:http://win.on.cc/epl 

周六(10日)晚英超頭場北倫敦打吡,熱刺憑「哈神」哈利卡尼取得個人第101個英超入波,主場以1比0擊敗阿仙奴,地獄賽程成功喺曼聯、利物物及阿仙奴身上狂搶7分,為嚟緊周中尾站、歐聯16強首回合作客鬥意甲祖雲達斯打下一支強心針。

熱刺沿用上場聯賽逼和利物浦嘅陣容出戰,阿仙奴就有上場對愛華頓連中三元嘅艾朗藍斯因病缺陣,賽前稱有傷或避戰嘅門將施治則可擔正。上半場熱刺不斷用兩邊傳中,喺阿仙奴門前製造險象,其中以27分鐘哈神門前6碼無人看管之下頂高最有威脅。阿仙奴上半場基本捱打,冇一次攻勢可以威脅到熱刺大門。

換邊後僅4分鐘,熱刺嘅高空攻勢終於有收獲,賓戴維斯左路傳中,哈神力壓哥斯尼近門頂入,雖然阿仙奴球員投訴哈神犯規,但球證判入球有效。熱刺領先後繼續狂攻,如果唔係哈神頭槌僅僅柱邊出界,與及基斯甸艾歷臣嘅靚罰球被施治救出,熱刺已將紀錄拉開。阿仙奴之後雖然換入拿卡錫迪及伊禾比加強攻力,但仍然無法取得入波,反而拉美拿、捷比亞仲有機會拉開紀錄。

阿仙奴被攻足全場,估唔到去到補時階段先有黃金機會出現,拿卡錫迪接應比利連右路傳中,喺無人看管下一射沖天,之後呢位法國前鋒殺入禁區乘洛里斯出迎,射遠柱僅僅柱邊出界,連續錯失2個黃金機會,結果熱刺保住1比0勝果完場,並以27戰得52分,壓過周日晚先有比賽嘅利物浦,升上聯賽榜第3位。

熱刺近3仗聯賽先後對曼聯、利物浦及阿仙奴,結果取得2勝1和,嚟緊周三凌晨佢哋就會出戰地獄賽程最後一站,就係歐聯16強首回合作客鬥祖雲達斯,睇嚇可唔可以過埋呢關。

Go Go 開波 GOAL DX 策略手遊
贏盡100萬現金獎賞 https://goo.gl/irtKhK 

東網體育同你追實體壇每個精彩時刻! 
https://goo.gl/ewVpvE 


本文來源:http://hk.on.cc/hk/bkn/cnt/sport/20180210/bkn-20180210223325208-0210_00882_001.html




Tag:
本文鏈接:http://www.mud-pumps.com/81101.html