政Whats噏:EQ陳肇始下廚 包餃子雞手鴨腳

政Whats噏:EQ陳肇始下廚 包餃子雞手鴨腳

政Whats噏:EQ陳肇始下廚包餃子雞手鴨腳

今日(8日)係三八婦女節,喺中國嘅傳統社會入麵,女性通常係照顧家庭嘅角色,其中入廚房煮嘢食係其中一項職責,所以民建聯婦女事務委員會主席葛珮帆就約埋食物及衞生局局長陳肇始齊齊炮製「玉米紅蘿蔔蝴蝶餃」、「紫薯玫瑰杯子蛋糕」,不過佢哋似乎都因為工作太忙,太少入廚房喇,整起上嚟似乎有啲雞手鴨腳,賣相差咁啲喎!

陳肇始包傷口就包得多喇,包餃子就似乎唔太在行,佢自己都話唔記得上一次入廚房係幾時,不過就記得以前喺英國讀書嗰陣,試過整馬豆糕,但其實馬豆糕係唔容易整,佢反覆練習多次之後,終於有一次睇落好靚好完美,點知一食先發現唔記得落糖!所以都係失敗收場。

至於葛珮帆都笑自己嘅製成品醜樣,仲話如果係包普通餃子,自己都有啲經驗,不過「蝴蝶餃」就第一次整,仲話大廚叫佢好似「數銀紙」咁搣靚隻餃子,但其實佢都唔明「數銀紙」嘅意思,令佢不禁慨嘆家庭主婦唔容易做,所以趁住婦女節向局長提咗10個訴求,包括免費接種子宮頸癌疫苗、延長產假和侍產假、免費乳癌普查等,實行為婦女爭取多啲權益咁話!


本文來源:http://hk.on.cc/hk/bkn/cnt/news/20180308/bkn-20180308141807182-0308_00822_001.html